Vagn Erik pápabeiggi (1927-2018) arbeiddi langt lív á Telegrafstøðini, og søgan um telegrafsamband millum Føroyar og umheimin fylti nógv í hansara hugaheimi. Eftir at Vagn Erik fór í 2018, kom eg at liggja inni við tilfari, sum Vagn Erik hevði skrivað og savna saman. Nakað av tilfarinum hevði Vagn Erik longu flýggja Skjalasavninum. Hann hevði í nógv ár mált hita í sjókaðlum, hetta hvussu hitin í sjónum broyttist við tíðina um okkara leiðir.
Nakað herfyri ringdi samskipari hjá Føroya Tele/Net til mín um tilfarið hjá Vagn Erik, tí íslendingar ætlaðu sær til Føroya til tess at kanna, hvat tilfar var at finna í Føroyum um søguna hjá fyrstu sjókaðalsambandinum við umheimin, sum Ísland var partur av. Føroyar var mett sum millumstøð úr Íslandi til Føroya síðani til Skotlands og út í heim.
Á ólavsøku 1906 fingu Føroyar fjarritasamband við umheimin, tá telegrafkaðal kom á land í Sandagerði. Seinni vóru fleiri kaðlar lagdir úr Føroyum millum annað ein, sum fór á sjógv á Velbastað, og í 1971 Shefa 1 kaðalin, sum var lagdur millum Hetland og Føroyar.
Myndin omanfyri sigur frá, at Shefa 1 kaðal mátti eisini leggjast millum Telegrafstøðina og Telefonstøðina, og tað er júst tað, menninir gera á myndini frá 1971. Við nýggja sambandinum kundi vit hava telefon 480 samtalur samstundis til Skotlands og út í heim. Millum Telegrafstøðina og Telefonstøðini var í 1971 løgd rørskipan, og gjøgnum rørið bleiv kaðal togaður, so Telefonstøðin eisini kundi fáa gleði av Shefa 1 kaðlinum. 11. desember 1971 kundi fólk ringja beinleiðis til útheimin gjøgnum Shefa kaðalsambandið.
Áhugavert á Tinghúsvegnum í 1971
Eitt er Shefa 1 kaðalin, men annað áhugavert er eisini á myndini frá 1971. Vít síggja onga gravmaskinu, men fleiri menn við spaka í hond. Tinghúsvegurin er ikki einsrættaður, bilsniðini hava eisini sína søgu, og elleidningar hanga enn í lyktapelunum.
Samskiftismenningin helt fram alla tíðina, og longu í 1975 var gjørligt at ringja beinleiðis til flestu lond í Europa gjøgnum somu kaðalskipan. Tá eg hyggi at myndini ovast, síggjast sprutl og skutarar, og meg minnist, hvussu nógvir skutarar koyrdu í havnargøtu um 1970, tí vanligi borgarin hevði ikki ráð at keypa bil. Tíðirnar gjørdust góðar í 1970 – árunum, og nú blivur mongu skutararnir skiftir út við minni bilar.
Kann til stuttleika nevna, at í 1970 vóru skrásett 3270 akfør í Føroyum, 1748 privatbilar, 613 vøru-og lastbilarnir, 56 bussar, 410 hýruvognar og 433 motorsúkklur, og tá eru prutlini ikki tald við. (Vagnur)
.
The post Úr myndasavninum – Í 1971 løgdu teir Shefa kaðal millum Telegrafstøðina og Telefonstøðina appeared first on Hvannrók.