Til stuttleika havi eg funnið fram eina kappingarskrá frá 1964, tað vil siga fyri 55 árum síðani. Tá var hondbóltur summarítróttagrein, og dystirnir vóru spældir á grúsvølli uttandura. Sum tit síggja í skránni, spældu kvinnurnar í bestu deildini tvær ferðir tjúgu minuttir. Liðini spældu í bólkum, og síðani spældu tey hálvfinalu og finalu. Heilt fáir dystir vóru spældir hesi árini.
Liðini høvdu ongan eyka spælara ella kanska bara tann eina, so sammeta vit dystirnar í 2019 við dystirnar í 1964, spældu spælarar kanska eins leingi í 1964 og spælarar í 2019. Tí nú sita fleiri spælarar uttan fyri vøllin enn spæla á vøllinum.
Leikaskráin boðar frá, at fyrsti landskappingardystur varð spældur 7. mai, og liðini vórðu býtt upp í økir. Spælt varð síðan til 11. juli, tá ið spælarar fóru í summarfrí. Meira enn mánað seinni 23. august spældi bólkur A og bólkur B hálvfinalur, og viku seinni 30. august varð finalan spæld.
Áhugavert at síggja í skránni, at Dúgvan úr Miðvági, Søljan úr Sandavági, ÍF úr Fuglafirði og TB av Tvøroyri spældu í bestu kvinnudeildini. VÍF, Kyndil, Stjørnan, Neistin og VB spældu í 1964, og men tí verri fær VB ikki mannað lið í vetur.