Stigatalvan og spennandi endaspurturin í grundspælinum

Eg rokni við, at mansspælarar hjá VÍF, KÍF og Kyndli hava meira enn einaferð hugt at stigatalvuni, tí “teoretiskt” kunnu øll trý liðini náa FM-finalurnar, tó Kyndil við heilt lítlum møguleika. VÍF og Kyndil hava tveir dystir eftir at spæla, meðan KÍF hevur tríggjar dystir. VÍF og KÍF kunnu sjálvi gera av, um tey koma í FM-finalurnar, liðini skulu bara vinna restandi dystirnar. VÍF skal spæla í Kollafirði 13. apríl, og skal KÍF vinna við meira enn tólv málunum, skal liðið vera betri í innanhýsis málum í mun til VÍF. 3. apríl skal KÍF inn á Skála at spæla ímóti StÍF, og tá kann nógv broytast á stigatalvuni, og gitingarnar hava tá eitt annað grundarlag.

Siga vit, at KÍF vinnur á StíF 3. apríl, so eru VÍF og KÍF jøvn í stigum við 28 stigum. Síðan kemur avgerandi dysturin í Kollafirði 13. apríl, og vinnur KÍF dystin, so er tað H71, sum kann velja, um liðið vil spæla ímóti VÍF ella KÍF í FM-finalunum. Tó skal sigast, at VÌF skal tá vinna á Neistanum í Vestmanna í seinasta dystinum.

So kann onkur spyrja, hvar tann teoretiski møguleikin er hjá Kyndli. VÌF skal tapa dystirnar fyri KÌF og Neistanum, og KÍF skal tapa fyri StÍF og H71. Tá hava VÍF og KÍF 28 stig. Kyndil skal vinna á Team Klaksvík og H71. Tá hevur Kyndil 29 stig. Hyggja vit at restandi dystum, so liggur VÍF best fyri at náa FM-finalurnar. Tó má eg leggja aftrat, at tað óskiljandi ella rættari sagt ræðandi, at eitt topplið sum VÍF, sum er favorittur at komu í FM-finalurnar, letur 72 mál fara í VÍF í tveimum fylgjandi dystum.

Er manskappingin áhugaverd í endaspurtinum í grundspælinum, so er kvinnukappingin ikki minni áhugaverd. Kyndil og VÍF kappast um at koma í FM-finalurnar at spæla ímóti Neistanum. Og tað eru júst VÍF og Kyndil, sum 28. mars, tað vil siga annað påskadag, spæla í Vestmanna. VÍF-kvinnur spæla her við rygginum ímóti múrinum og eru í júst somu støðu sum seinasta kappingarár. Tá skuldi VÍF vinna á Kyndli í Vestmanna, men tapti við einum máli. VÍF skal vinna dystin, skal liðið varðveita møguleikan at koma í FM-finalurnar.

Siga vit, at VÍF vinnur á Kyndli og vinnur í Vági 10. apríl, ja, so standa neistakvinnur knappliga við møguleikanum at velja, um tær vilja spæla FM-finalur ímóti Kyndli ella VÍF. Men ikki rokni eg við, at henda støðu uppstendur.

Tað løgna við dystinum í Vestmanna mánadagin er, at VÍF-venjarin stendur í løgnari støðu. Hann skal royna at vinna VÍF dystin, men á kyndilsliðnum spælir dótturin, sum skjeyt ellivu mál í seinasta dystinum. Hesin evnaríki spælarin, kann gott koma at gera av, um VÍF framvegis er partur í FM-finalustríðnum ella enn einaferð má siga farvæl til FM-dreymarnar. Vit síggja á stigatalvuni og restandi dystunum, at kyndilskvinnur hava annan fótin í FM-finalunum, men kanska vilja VÍF kvinnurnar nakað annað hesuferð. (Vagnur)