Tá eg flaggdagin fyri klokkan sjey um kvøldið leitaði mær oman á Vestaru bryggja at hyggja at kappróðri/ódnarøkum, tá kavaði, og nakað var av vindi. Og í morgun er hvítt í fjøllunum. Ikki sást á rógvarum, at tað var bítandi kalt í luftini. Frálíka tiltakið var fyrireikað so mikið væl, at byrjað var til tíðina, og hesuferð var gjørt soleiðis, at tríggjar bátastøddir róðu fyrst ódnartøkini. Teinurin 140 metrar skal rógvast tríggjar ferðir. Manningarnar koma á henda á hátt ikki at sita so leingi í bátunum. Eftir einar tjúgu minuttir kundu tey fara í land aftur og í heit klæði. So sluppu næstu bátastøddir framat. Frálíkt fyriskipað róðrartiltak.
Fyri meg hevur ikki stóran týdning, hvør vinnur, men tað halda rógvararnir sjálvandi ikki. Áhugavert fyri meg at síggja, hvussu manningarnar eru fyri so tíðliga á árinum. Fara vit til barnaróðurin, har rógvarar eru 12,13 og 14 ára gamlir, so sást, at teir yngstu rógvararnir høvdu ongantíð áður ligið við start og skuldu rógva kapp fyri fyrstu ferð. Kropsliga og í styrki kann vera heilt stórur munur á einum tólv ára gomlum unglingi og einum 14 ára gomlum. Hetta sást eisini mánakvøldið.
Ódnartøkini vera avgreidd við føstum starti, har bátarnir leggja seg við startin, og dómarin rópar, at um ein minutt verður skotið. Tá tjúgu sekund eru eftir, telur dómarin niður til null og tá brestur skotið. At bátarnir ikki lógu púra yvir eins við startin, hevur sína orsøk. Manningarnar mugu rógva eitt sindur alla tíðina, so endin frá bátinum í startin er strammur. Hetta haltaði hjá nøkrum manningum. Ì FM-róðrunum er eisini fastur startur, men tá leggur dómarin eisini bátarnar, so teir liggja yvir eins, tá skotið fer.
Tað er eitt afturvendandi toymi við fólki úr Havnar róðrarfelag, Róðrarfelagnum Knørri og Argja róðrarfelag, sum eru klár at taka eitt tak fyri kappróðurin, tað veri seg ólavsøkuróðurin ella ódnartøkini. Magni Nielsen ger startin og syrgir fyri, at hann riggar sum hann skal. Startdómari var Jón Johansen við Hugo Joensen sum hjálpara. Høvuðsfyrireikararnir Fróði Magnussen og Teitur Samuelsen vóru sjálvandi har, og so fleiri fólk í málbilinum. Máldómari var Kenneth Samuelsen, og Bjarti Mohr var eisini har. Maðurin, sum syrgir fyri hagtølunum er Ragnar Thomsen. Róðrarsambandið letur eisini eina hjálpandi hond við máltólum.
Kunnu vit so fáa nakra ábending so tíðliga á árinum? Jú, har vóru ábendingar. Gleðiligt at síggja, at har vóru fýra 6-mannafør við kvinnum, har tær umborð á Rádna úr Fuglafirði er væl fyri og halda fram umborð á 6-mannafarinum, har tær í fjør gjørdu bart umborð á Erlu kongsdóttir. Eingin ivi um, manningarnar umborð Havnarbátium, Eysturoyingi og Orminum langa fáa sína sak fyri, tí Drekin reyði var øgiligur mánakvøldið við einum 140 langum spurti. Bara tvey 10-mannafør róðu mánakvøldið. Umborð á Havnarbátinum vóru tveir mans smáskaddir, og Fróði hevði jú ábyrgdina av ódnartøkunum. Vit vita um fýra 10-mannafør, sum rógva í summar.
8-mannaførini vóru trý. Nevið Reyða, Knørrur og Argjabáturin. Tað frættist í gjárkvøldið, at Miðvingur er við í summar, og hetta boðar frá góðum. Eg haldi, at allar manningar, sum ætla á rógva í summar, skulu royna eisini at rógva ódnartøkini. Hetta at vera við og venja seg at liggja við startin. At róðursfólkini venja seg at loysa úr bátin , og at serliga tey ungu, og serliga tey, sum rógva fyrstu ferð, sleppa at rógva kapp heilar níggju ferðir, áðrenn norðoyastevnu. Hetta gevur venjing í allar mátar.
Eg havi varhugan av, at kappróðurin í summar fær viðvind í bátatali. Ódnartøkini flaggdagin boða frá hesum. Sjávlt um kalt var í veðrinum, so vóru fleiri fólk og hugdu at ódnartøkunum enn undanfarin ár. Tú skalt altíð hava loyvi at vóna. Mín vón er, at vit í summar síggja fleiri bátsmanningar enn undanfarin ár. Vilt tú síggja øll úrslitini frá ódnartøkunum flagdagin, so er at fara inn á Kappróðrarkjak. Uppískoyti: 6-mannafarið Hósvíkingur er mannaður við monnum, sum skulu rógva við Gongurólvi. Hesin bátur er um at vera liðugt smíðaður. (Vagnur)
